TBS Chungchang

Trinitarian Bible Society hi vannoi pumpia miho Bible pao phapen bua konna dihtah'a kiledoh Pathen Thutheng Bu hoppeh dinga houbung khentum umlouva kiloikhomna 1831 kuma anakiphutdoh ahi.

1831 kuma hiche Kiloikhomna (Society) hondohna kikhopkhom nia patnin hiche natohna le thil kikhel tampia konin Pathen khut panna akimun ahi. Hinla akihondohna kikhopkhom nia patna thilkhat akikhel lou chu: doile tup hi ahi.

Hiche kiloikhomna (Society) doile tup chu ahile Khrista Jesua tahsana konna sochatna dinga mihem chihsahthei Pathenin ahu ahaikhuma kipe Pathen phattheina PATHEN THUTHENG hi inna le gampama hopdoh'a Pathen loupina le mihem sochatna thu dopsang ding chu ahi.

Tuhin TBS hin Bible ledohna le velledohna (revision) tohgon somli val akineijin ahi. Hichia chu ahithei channa Bible paoho, Thulhun Lui dinga Hebrew Masoretic chule Thulhun Thah dinga Greek Received Texts a konna jangpetna kiledoh'a ahi. Ahithei channa Pathenin ahaikhum Pathen thu ahina bangtah'a kiledoh ahitheina dinga ‘Chenalhongpi masa toh kibang’ (principle of formal equivalence) kijuija kiledoh'ah ahi.

Pathen Kamsunga kiseidoh le lhingsetna Pathenin ahaikhum thuhil (doctrine) chule Pathen thilgon (providential) kichingtup (preservation) thuhil hohi Pathen thu hetna dinga ngaikhoh'a abulpi chu ahi. Atilla Pathenin ahaikhum satah'a kijih (autographs), ho Hebrew Thulhun Lui leh Greek Thulhun Thah chu tuhin umtahih jeng jongle Hebrew Masoretic Text le Greek Received Text (Textus Receptus tia jong kihe) hi Pathen Thu thengtah leh amite lah'a hungkilason le hungkipeson thusima Pathenin ahinchintup ahi tihi tahsanna neitah'a kihe'ah ahi.

Textus Receptus Thulhun Thah'a Pathen thu kimuhi abula patna hung kipe tahsan umtah'a kivetsah'a kijihdoh ahi tihi adih monge tia dettah'a itahsan theiju ahi. Pathenin khang tamtah sunga Greek text ho tahsanho atadoh sah'a chule hichea konna chu Bible ho ledoh'a aumsah ahi.

Akhang khanga hung kihamana Greek paova kijihdoh ho Textus Receptus in ajui hi Reformation khanga Bible tampi bulpia anakimanga ahi. Pathenin achintup jing A Thulhun Thah hi Amiten amanchah diuva Pathen kaihoina noija um amiten anatadoh'u ahin,   hitajeng jongle hiche hi tonsotna patna Pathen Thutheng chu ahi. Tu khanga Greek Paova kijihdoh (modern Greek texts) ho le hiche ho juija kiledoh hohi (versions) Christian hon mangcha louva, amavang Textus Receptus Greek Thulhun Thah tahsan umtah'a kiledoh ho, Pathenin khang tamtah phatthei aboh hi manchah joh ding ahi.

Khatvei akiledoh'a ahilouleh akivelledoh chaitengle Pakaiyin eihitheisah dungjuijuva Pathen Thu tadohna dingle hopdohna dinghi kigelkhoh'a ahi. Akiledoh hohi tahsan umtah leh kitohtah ahi ding jonghi kikhohsah'a ahi. Abangkhatna chun hiche ledohna ding hohi TBS in akigongin, adangkhatna chu ahile Bible text phapena kona kiledoh'a ahi. Chujongle achungchona hi Protestant te Bible thuhilho (doctrines) le Thumhina Theng (Holy Trinity) kikolchah kheh'a ahi.

TBS Doiletup

Hiche Kiloikhomna(Society) doile tup pipen chu ahile Khrista Jesua tahsana konna sochatna dinga mihem chihsahthei Pathenin ahaikhuma kipe Pathen Thutheng hi inna le gampama hopdoh'a Pathen phattheinale Athuthenga kingaija Pathen loupina le mihem sochatna thu dopsang ding hi ahi. Hiche chungchang thua doile tup ho noijahin kichehtah'in akipei:

→ Pao tamtah'a Pathen Thutheng tadoh'a vannoi pumpia hopjal ding.

→ Bible kiledoh hohi dihtah le tahsan umtah'a Authorized Version anakiledohna Hebrew Masorectic Text Thulhun Lui le Greek Textus Receptus Thulhun Thah dopsang ding.

→ Chonsetna mangthaiho le houdih loule tahsan lou muthima umho henga Christa Kipana Thupha'a vah le hinna pole manchah hiding.

→ Reformation Christian te chena lhongpi dopsanga, Pa Pathen, Chapa Pathen chule Lhagao Theng, Pathen hina kibahna le tonsot Pathen hina chule Thuma Pathen Khat ahina hettohsa ding.

→ Bible hi Pathenin ahaikhum, adihmo beihel Pathen Thu ahina dopsang ding.

→ Pathen loupina dingle Aleng gam kehletna dinga Protestant ten apom ahiloule akisubohlou Pathen Thu kitatdoh ho hopjal ding hi ahi.

Nam jouse henga Pathen Thu hopdohna natoh akijom thei jingna dingle panpina akinei theina dingin taona'a neihin hudiuvin kahintemuve.

Thadou Bible Kiledoh

Thadou Bible kiledoh masapen chu Gospel Johan 1925 kuma anakitatdoh chu ahi. Kum phabep jou 1933 kumin Rom mite Henga Paul Lekhathot anakitadoh'in hiche ban chun 1942 kumin Bible Society of India in Thulhun Thah (New Testament) anatatdoh'e.

Khonungin Thulhun Thah chu akivelledoh kitnin 1973 kumin TBS in bu 10,000 Thadou mipiho hopeh dingin anatatdoh'in ahi. 1992 kuma pat 1995 sungin Manipur gamsunga nam kikah'a boina anaumin Thadou ho chenna in tamtah anakihalhan, mitamtah ho Thulhun Thah buho jong meijin anakihalvam pehtan ahi. Hiche jouva pat TBS in 2014 kuma akivelledoh le akisudih atadoh geichun Thulhun Thah chu bu themcha khat bou anaumtan ahi.

Kum 1974 vella pat chun Thadou Lekhathem ho hon khatnin Authorized (King James) Version'a konin Thadou Bible analepanun, hinla aledohsao chu phat sottah tadoh louvin anaumin ahi. 2005 kumin aledoh ho hon laha'a mi khat toh TBS ahung kihoumatnin hichea pat chun TBS makaina noija Thulhun thah chu velvetnale sudihna akineijin 2014 kumin anakitadoh'in ahi. Chuban jomin 2020 kumin Thadou Bible lhingset chu akittatdoh tan ahi.

Manipur gam sunga Thadou Bible kihopdoh pat dingtoh lhonin, Pathenin hicheho hi Ama loupina dingle Jana dinga amancha'a Christa Kipana Thupha kihopdoh toh lhona Aleng gam kehletna aumna dingin Taona kahin ngeh uve.